Storia de la Namibia

La storia de la Namibia la xe na storia stratificata. El paexe el existe ufisialmente solo da pochi ani, uno de i ultimi teritori africani a verghe l’indipendensa. Ma la presensa umana in Namibia la se perde inte el pasà pi antico.

Preistoria

I ricatamenti paleongologici i conferma che on grande numaro de popoli i ga visù in Namibia inte i secoli prima de l’era cristiana. La majoria i xera popoli caciatori-racoglitori. Se pensa anca che sti popoli i fuse boscimani, del grupo ciamà san.

Khoisan

Fin al scominsio de la nostra era, i san i xera i soli abitanti de la Namibia. Verso el I secolo d.C., i namaqua – los teso grupo vien ciamà khoikhoi in Sudafrica – i xe rivà sol fiume Orange, al confin tra Namibia e Sudafrica. I namaqua i fazea na vita pastoralista. I khoikhoi e i san i se sa integrà culturalmente e lengoisticamente fin a parlar on grupo de lengoe ciamade khoisan. I damara, n’altro grupo khoisan, el se sa stabilio in tel sentro del paexe.

Bantu

Grupi bantu come i owambo e i kavango i ga visù in tel nord de la Namibia da secoli. Sti grupi i xe bacani e pescadori, e i conose la tecnologia del fero. I gavea contati co le tribù del sud sora-de-tuto par baratar cortei e magnare.

Herero

Verso el XVII secolo, i herero – grupo bantu pastoralista originario de la region de i Grandi Laghi i xe rivà in Namibia e i se sa stabilì in Kaokoland. En tel XIX secolo, i ga continuà la migrasion fin al sud, in Damaraland. El grupo restà in tel nord el ga da vita a i himba.

Baster

L’ultimo grupo a rivar in Namibia prima de i eoropei i xe stà i baster. I baster i xera i disendenti de sangue misto de boeri e done africane. I baster i xera calvinisti e i parlava Afrikaans, i se considerava pi bianchi che neri. I ga fondà la sità de Rehoboth e in tel 1872 anca la Republica de Rehoboth.

Namibia moderna

I primi eoropei a rivar in Namibia i xe stà i portoghexi che i ga sbarcà so la costa in tel 1485. I portoghexi no ga mai tentà de visitar l’interno. I olandexi i ga utilizà la baia de Walvis, l’unico porto a àcue profonde longo tuta la costa namibiana, za in tel 1793. Co i inglexi i ga tolto el control de la colonia del Cao, anca Walvis la xe pasà a lori. Olandexi e inglexi i no ga neanca tentà de esplorar l’interno.

En tel XIX secolo, i popoli de la Namibia i xe vegnù in contato co i eoropei. Le se ga anca catà al sentro de on movimento de popoli che el ga causà frizioni e guere locali. A lo steso tenpo che i herero i ga ocupà el Damaraland, anca i boeri del Sudafrica e i oorlan – grupo de khoisan che parlava afrikaans e che i xera armadi – i volea entrar inte la Namibia. I oorlans i ga prima de tuto causà la migrasion de i namaqua. En tel 1830, el cao de i boeri, Jonker Afrikaner, el ga firmà on pato co Oaseb, el cao de i namaqua. I oorlan i dovea difendar le savane del Namaqualand da la imigrasion herero che la xera scominsiada qualche ano prima; i nama i dovea pagar on tributo in bestie par sto servisio; i boeri i se podea stabilir a Whindoek, al confin del teritorio herero. La guera tra boeri e herero la xe stà vinta da i boeri par la superiorità de le armi da fogo.

Colonizasion

Co la division de l’Africa a la Conferensa de Berlin, anca la Namibia la xe entrà soto le mire espansionisteghe de Regno Unio e Germania. I inglexi i gavea za el control de la baia de Walvis, i todeschi i volea tuta la region. En tel 1883, Adolf Lüderitz el ga crompà Angra Pequena – nome portoghexe de la baia de Walvis – dal cao nama de la zona. En tel 1884, Otto van Bismarck – canceliere todesco – el ga proclamà el protetorato de l’Africa del Sud-ovest. En tel 1890, Germania e Regno Unio i ga firmà on tratato che ghe dava la Strisia de Caprivi a i todeschi e Zanzibar a i inglexi.

Anca prima de la proclamasion del protetorato, i todeschi i gavea mandà na spedision militare in Namibia. I namaqua i ga resistio a l’invasion soto la guida del cao Hendrik Witbooi. Witbooi nol ga podù vinzar contro le armi da fogo e, in tel 1894, el ga firmà on tratato de protesion co i todeschi.

Soldadi todeschi che conbate co guerieri herero.

I todeschi i ga subito mandà de i coloni par ocupar el paexe. En tel 1908 i ga catà i diamanti e in pochi ani miliari de todeschi i xe ndà in Namibia. El raporto co i nativi el xe senpre stà dificile e trupe selte todesche le ga continuà a conbatar contro i namaqua e altre etnie. Tra el 1904 e el 1908, i herero i ga copà 150 todeschi che i gavea ocupà el so teritorio. I todeschi i ga risposto co la guera. Samuel Maharero, cao de i herero, el xe stà subito fortunà contro le schutztruppe del general Lother von Trotha. Anca i namaqua i ga scominsià la guera soto la guida de Hendrik Witbooi.

I todeschi i ga dovù mandar 14 000 soldadi che i ga vinto la Batalia de Waterberg in tel 1905. Co la fin de la guera, i todeschi i ga ordenà a i herero de lasar el paexe. I herero i se sa ritirà verso el Kalahari. I todeschi i ga meso guardie armate a tuti i ponti de abeverata. 80 000 persone - l’80% de la popolasion herero e el 50% de la popolasion namaqua - le xe morte de se. En tel 1915, co la Germania la xe entrà in guera contro el Regno Unio, le trupe sudafricane le ga ocupà la Namibia. Dopo la guera, el Sudafrica el ga risevù da la Lega de le Nasion el conpito de aministrar el teritorio. En tel 1946, co le Nasion Unie (ONU) le volea revocar el mandato del Sudafrica par pasar a on control internasional pi forte el Sudafrica nol ga volù lasr el paexe, anca se no lo ga mai aneso. En tel 1966 l’ONU el ga revocà el mandato del Sudafrica.

Verso l’Indipendensa

En tel 1966, guerilieri de l’Organizasion de i Popoli de l’Africa del Sud Ovest (SWAPO), i ga scominsià la guera de indipendensa contro el Sudafrica. La SWAPO la gavea baxi in Zanbia e in Angola. L’ONU la ga dichiarà che la presensa del Sudarica in Namibia la xera ilegale. L’ONU la ga tentà de rivar a na solusion negosiata, ma el Sudafrica nol ga volesto saver de darghe l’indipendensa a la Namibia.

El Sudafrica el xera soto presion internasionale par lasar la Namibia, ma el gavea anca el sostegno indireto de i Stati Unii de America par restar in tel paexe. Durante i ani 1970 e 80, l’Angola la ospitava trupe cubane e la xera jutà da l’Unione Soviètega. I amricani i no volea che la zona la finise tuta in mane ruse.

A el incontro de Mosca (29 magio - 1 giunio, 1988), i cai de governo americano e ruso i ga deciso che el Sudafrica el se ritirase da la Namibia e che i cubani da l’Angola. El tratato de transision la xe stà firmà a New York a la fin del 1988. El periodo de tranzision el dovea durare 11 mexi e parmetare el ritorno in Namibia de la popolasion rifugiada in altri paexi.

Indipendensa

El 9 febraro 1990, la Asenblea Costituente la ga finì de scrivar la nova Costitusion, e el 21 marso 1990 la Namibia la deventava no stato indipendente. Sam Nujoma, leader de la SWAPO, el xe stà eleto primo Presidente e el ga giurà fedltà al paexe de fronte a leader africani vegnudi da tuto el continente. El 1 marso 1994, la baia de Walvis e 12 ìzołe le xe sta restituie a la Namiba dal Sudafrica par completar la transision.

Dopo esar stà rieleto in tel 1994, Nujoma el se sa presentà par na tersa olta. Par farlo, el ga dovù canbiar la Costitusion che la prevedea solo do turni. En tel 2005, Nujoma el ga lasà el posto a Hifikepunye Pohamba.

Portałi